Raviteja Tiger Nageswararao: రవితేజ హీరోగా నటిస్తున్న తాజా చిత్రం టైగర్ నాగేశ్వరరావు (Raviteja Tiger Nageswararao). స్టువర్టుపురం దొంగగా చెప్పుకునే టైగర్ నాగేశ్వరరావు జీవితం ఆధారంగా ఈ సినిమాను తీస్తున్నారు. వంశీ ఈ సినిమాకు దర్శకుడు. ఈ సినిమా ప్రారంభోత్సవం హైదరాబాద్లో జరిగింది. ముఖ్య అతిథిగా చిరంజీవి వచ్చారు. ఈ సినిమా ప్రీ లుక్ మోషన్ పోస్టర్ను రిలీజ్ చేశారు. ఈ సందర్భంగా చిరంజీవి మాట్లాడుతూ – ‘‘నా చిన్నతనంలో టైగర్ నాగేశ్వరరావు గురించి విన్నాను. అప్పట్లో ఆయన్ను హీరోగా చెప్పుకునేవారు. ఆయనపై ఆసక్తితో మా నాన్నగారుని (కొణిదెల వెంకటరావు) అడిగి మరిన్ని విశేషాలు తెలుసుకున్నాను. లాక్డౌన్ సమయంలో వంశీ ఈ కథను నాకు చెప్పాడు. నాకు చేయడం కుదర్లేదు. ఇప్పుడు తమ్ముడు రవితేజ చేస్తున్నందుకు చాలా సంతోషంగా ఉంది. ఈ సినిమాలోని టైగర్ నాగేశ్వరరావు పాత్రకు తను సరిగ్గా సరిపోతాడు’’ అని అన్నారు. ఈ కార్యక్రమంలో హీరో రవితేజ, ఈ చిత్రం నిర్మాత అభిషేక్ అగర్వాల్, ఈ చిత్రం హీరోయిన్స్ నూపూర్ సనన్, గాయత్రీ భరద్వాజ్, బీజేపీ నాయకుడు కిషన్ రెడ్డి, కశ్మీరీఫైల్స్ దర్శకుడు వివేక్ అగ్నిహోత్రి తదితరులు పాల్గొన్నారు.